ഭൂമിയിലെ അവസാന ദിനം

ആ ദിവസമെന്നാവും?

അന്ന് നീ വന്ന്

നനുത്ത മേനിയില്‍

നെറ്റിയില്‍ മെല്ലെ

ഉമ്മ വെക്കും,

ഇതുവരെ തരാന്‍ കഴിയാതെ പോയത്.

അന്നു നീ

എന്‍റെ ചെവിയില്‍ പറയില്ലേ..

ഞാനിത്ര കാലം കേള്‍ക്കാന്‍ കൊതിച്ചത് .

അന്നെങ്കിലും

എനിക്കായി

പൊഴിക്കാന്‍ രണ്ടിറ്റെങ്കിലുമുണ്ടാകില്ലേ..

നിന്‍റെ കണ്ണില്‍,

ഞാനിത്രകാലം പൊഴിച്ചതിന് പകരമല്ലെങ്കിലും.

ആ ദിവസമെന്നാവും ?

അന്ന് നീ യാത്രപോകും

നമ്മുടെ

ഫ്ളാഷ് ബാക്ക് ലോകത്തേക്ക്

ബ്ലാക്ക് ആന്‍റ് വൈറ്റ്

ചിത്രങ്ങള്‍ എവിടെയൊക്കെയോ

തെളിയും

ആ ദിവസം എന്നാകും?

അടക്കം ചെയ്ത രാത്രി

വീട്ടിലെ സായാഹ്ന ചര്‍ച്ചയില്‍

ഞാനൊരു വിഷയമായിവരാതിരിക്കില്ല-അവര്‍ക്ക്,

"എന്തായിരുന്നാലും …..അവന്‍ ആളൊരു…"

പിന്നെല്ലാവരും മൗനത്തിലാവും.

എനിക്കറിയാം

അന്ന് നീ പ്രാര്‍ഥിക്കും

ആദ്യത്തേയും അവസാനത്തെയും

പ്രാര്‍ത്ഥന നൂലാല്‍ ബന്ധം.

ആ ദിവസമെന്നാകും?

കാരണങ്ങളുണ്ടാകാത്ത

ഭൂമിയിലെ

ആദ്യത്തെയും അവസാനത്തെയും ദിവസം.

അന്നത്തെ വസന്തത്തില്‍

ഒരു പുഷ്പമെന്‍ കുടീരത്തില്‍

വെക്കാന്‍ ബുദ്ധിമുട്ടാവില്ലല്ലോ..

നീ വരാഞ്ഞതിലല്ല പ്രിയേ,

പോകുന്നതില്‍ മാത്രമായിരുന്നു  പരാതി

കാത്തിരിക്കുന്നു.

ആ ദിവസം എന്നാകും ?